I.
De bone amor vient seance et bonté,
et amors vient de ces deus autresi.
Tuit troi sunt un, qui bien i a pensé;
ja a nul jor ne seront departi.
Par un conseil ont ensenble establi
li coreor, qui sont avant alé:
de mon cuer ont fet leur chemin ferré;
tant l'ont usé, ja n'en seront parti.
II.
Li coreor sunt la nuit en clarté
et le jor sont por la gent oscurci:
li douz regart plesant et savoré,
la granz biautez et li bien que g'i vi;
n'est merveille se je m'en esbahi.
De li a Deus le siecle enluminé,
car qui avroit le plus biau jor d'esté,
lez li seroit oscurs a plain midi.
III.
En amor a paor et hardement:
li dui sont troi et du tierz sont li dui,
et grant valeur est a eus apendant,
ou tout li bien ont retret et refui.
Por c'est Amors li hospitaus d'autrui
que nus n'i faut selonc son avenant.
G'i ai failli, dame, qui valez tant,
a vostre ostel, si ne sai ou je sui.
IV.
Or n'i a plus fors qu'a li me conmant,
car touz biens fez ai lessié pour cestui
ma bele joie ou ma mort i atent,
ne sai le quel, dès que devant li fui.
ne me firent lors si oeil point d'ennui,
ainz me vindrent ferir si doucement
par mi le cuer d'un amoreus talent
oncore i est li cous que j'en reçui.
V.
Li cous fu granz, il ne fet qu'enpoirier,
ne nus mires ne m'en porroit saner,
se cele non qui le dart fist lancier.
Se de sa main i daignoit adeser,
bien en porroit le coup mortel oster
a tout le fust, dont j'ai grant desirrier
mès la pointe du fer n'en puet sachier,
qu'ele bruisa dedenz au cop doner.
VI.
Dame, vers vous n'ai autre messagier
par cui vous os mon corage envoier
fors ma chanson, se la volez chanter.