Wallensköld

Versione stampabilePDF version

I.
Phelipe, je vous demant 
que est devenue amors: 
en cest païs ne aillors 
ne fet nus d'amer senblant. 
Trop me merveil durement 
por qu'ele demore ensi, 
s'ai oï 
des dames grant plaint, 
et chevalier en font maint.
  
II.
- Sire, sachiez voirement 
qu'amors faut par ameors, 
s'en remaint joie et valors 
et faillent tornoiement, 
si ont corpes mesdisant, 
vielles et mauvès mari; 
n'est failli 
par dames qu'en aint, 
mès es chevaliers remaint.
 
III.
- Phelipe, bien m'i acort 
q'il remaint es chevaliers, 
mès tout ce fet li dangiers 
que dames mainent tant fort. 
quant il sont jusqu'a la mort, 
lors lor metent achesons. 
bon respons 
n'i puënt trouver, 
s'en font maint desesperer.
 
IV.
- Sire, il s'en partent a tort 
et s'en plaignent volentiers. 
Plus lor plest li aaisiers 
qu'atendre d'Amors confort, 
n'aiment valor ne deport, 
ainz tolent et font mesons; 
n'est resons: 
cil qui veut amer 
se doit du tout amender.
 
V.
- Phelipe, legierement 
s'en partent qui poor ont, 
que les dames trop leur sont 
de sauvage acointement. 
Dame doit atrere lent 
por melz fere a li baer, 
que d'amer 
doit dame savoir 
por plus faire ami valoir.
 
VI.
- Sire, trop hastivement 
vuelent mès par tout le mont 
cil qui amoureus se font 
avoir joie entierement, 
mès dames a lor talent 
doivent lor amis mener. 
Endurer 
doit on lor voloir 
sanz plaindre et sanz decevoir.
 
VII.
- Phelipe, ami voir 
n'en sevent pas le pooir.
 
VIII.
- Sire, tout pour voir, 
dames font le mont valoir.