I.
- Girart d'Amiens, Amours, qui a pouoir
sor toutes gens, vous et un autre esprendre
fait de son feu - dont mieus devez valoir
d'une dame ou il n'a que reprendre.
Se vous voulez, tantost, sans plus atendre,
ou vous plaira avecques vous l'avrez,
mais bien sachiez: de li haïs serez;
ou, en tel point que je vos di, l'avra
autre avec lui, et el vous ainmera.
II.
- Roy de Navarre, il doit bien mescheoir
a tout honme qui le bien n'osse prendre,
puis qu'il le puet, sans lui mesfaire, avoir;
car nus amis ne porroit tant mesprendre
que de sousfrir, s'il le pouoit desfandre,
c'autres fust ja de sa dame privés;
par coi le bien qui m'iert abandonnez
par tel eür ne refusserai ja,
n'autres, mon gré, nul jour n'i partira.
III.
- Girart d'Amiens, huimais puis parcevoir
que vous le cuer avez et fol et tendre
a un tel fait desloial conscevoir,
si vueil que vous, pour la folie entendre,
sachiez qu'amis n'est pas chilz qui engendre
riens dont il soit haïs ne disfamés
de la dame dont il seroit amez,
s'il li plessoit, et dont haïs sera,
quant tout premiers, son gré, la decevra.
IV.
- pour pis que mort ne rage recevoir,
sire, ne puis connoistre ne aprendre
qu'il m'en peüst nesun bien escheoir.
Conment pourroie a plus grant dolour tendre
que de lessier tant ma dame souprendre
qu'autres eüst de li ses voulentez?
Plus ne pourroie estre desesperés,
s'elle me het. Amours pourchacera
qu'amés en ier si tost que li plera.
V.
- Girart d'Amiens, quant plus vous voy mouvoir
d'ensi parler, plus m'est vostre sens mendre.
Nus hons n'entant sa dame a decevoir
ne deserve que l'en le doie pendre.
Se mes eürs fait ma dame destendre
a un tel fait, n'en vueil estre encombrés;
j'ain mieus qu'autre que moy en soit blasmés.
S'amer me vueut, plus me proufitera;
c'uns tieulz deduiz jamais ne vous vaudra.
VI.
- Sire, ne puis en pensee mannoir
c'uns teus profis se puist en bien estandre
dont li amis cherra en desespoir,
qu'il n'osse en riens qu'il parçoive contendre;
par quoi ja jour ne me quier vaincu rendre,
que mieus ne vueille ensi joïr assez
de celle a cui je sui touz que de lés
reveingne autres qui en esploitera.
Honnis soit cilz qui ce otrïera!