I.
Baudoïn, il sunt dui amant
qui ainment de cuer sanz trichier
une pucele de jovent.
li quelx la doit mieuz desraignier?
Li uns l'ainme por ses valors
et por sa cortoisie ausi;
li autres l'ainme par amours
por la grant beauté qu'est en li.
II.
- Sire, saichiez certeinnement
que celui doit tenir plus chier
qui por son bon ensoignement
l'ainme de leal cuer entier;
car cortoisie et granz honors
plaisent plus a leal ami
que beautez ne fresche colors
ou il n'a pitié ne merci.
III.
- Baudoïn, la tres grant beauté
a valor et mainte vertu.
S'ele disoit grant niceté,
onques si cortois moz ne fu.
Granz beautez fait cuer forsenner
plus que nule autre rien vivant,
ne nuns ne puet son cuer doner,
se la beautez n'i est avant.
IV.
- Sire, saichiez de veritè:
beautez a tout son non perdu,
puis que valors a alevé
a dame son non et creü;
car cortoisie fait loër
dames et bel acointement
et toz jors en bon pris monter,
ce dont beautez ne fait noiant.
V.
- Baudoïn, assez trueve l'en
vielles plus laides que nuns chiens
qui ont cortoisie et grant sen,
mais au touchier ne valent riens.
Si la fait or si bon amer
por ce que bel vos parlera?
La bele ne puet mesparler,
ainz est bon quanque me dira.
VI.
- Sire, je ne dirai oian
qu'a vielle soie, ne ja siens
ne serai mais, si con j'entent.
Blamer me volez les granz biens
que bele dame set mostrer
qui cortoisie et bon pris a.
Mieuz devriez celui blamer
qui por beauté valour laira.
VII.
- Baudoïn, soul d'un resgarder
ou d'un ris, quant le me fera,
la bele que je n'os nonmer
vaut quanque la laide donra.
VIII.
- Sire, li miens cuers remuër
ne se veut de cele qui l'a.
Valors l'a fait emprisoner,
qui de cortoisie li dona.