I.
Une chanson oncor vueil
fere por moi conforter.
Pour celi dont je me dueil
vueil mon chant renouveler;
pour ce ai talent de chanter
que, quant je ne chant, mi oeil
tornent souvent a plorer.
II.
Simple et franche, sanz orgueil
cuidai ma dame trouver.
Mult me fu de bel acueil,
si le fist por moi grever.
Si sont a li mi penser
que la nuit, quant je sonmeil,
vet mes cuers merci crïer.
III.
En dormant et en veillant
est mes cuers du tout a li
et li prie doucement,
conme a sa dame, merci.
En sa pitié tant me fi
que, quant g'i pens durement,
de joie toz m'entroubli.
IV.
Joie et duel a cil souvent
qui le mien mal a senti.
Mes cuers plore, et ge en chant;
ensi m'ont mi oeil traï.
Amors, tost avez saisi,
mès vous guerredonez lent;
ne pour qant de moi vous pri.
V.
Hé, las! s'il ne li souvient
de moi, morz sui sanz faillir.
S'el savoit dont mes maus vient,
bien l'en devroit souvenir.
Cist maus me fera morir,
se ma dame n'en soustient
une part par son plesir.
VI.
Chanson, di li sanz mentir
c'uns resgarz le cuer me tient
que li vi fere au partir.