I.
Tant ai amors servies longuement
que dès or mès ne m'en doit nus reprendre
se je m'en part. Ore a Dieu les conmant,
qu'en ne doit pas touz jorz folie enprendre;
et cil est fous qui ne s'en set desfendre
ne n'i conoist son mal ne son torment.
On me tendroit dès or mès per enfant,
car chascuns tens doit sa seson atendre.
II.
Je ne sui pas si com cele autre gent
qui ont amé, puis i vuelent contendre
et dïent mal par vilain mautalent.
On ne doit pas seigneur servise vendre
ne vers Amors mesdire ne mesprendre;
mès qui s'en part parte s'en bonement.
Endroit de moi vueil je que tuit amant
aient grant bien, quant je plus n'i puis prendre.
III.
Amors m'a fet grant bien enjusqu'ici,
qu'ele m'a fet amer sanz vilanie
la plus tres bele et la meilleur ausi,
au mien cuidier, qui onques fust choisie.
Amors le veut et ma dame m'en prie
que je m'en parte, et je mult l'en merci.
Quant par le gré ma dame m'en chasti,
meilleur reson n'ai je a ma partie.
IV.
Autre chose ne m'a Amors meri
de tant com j'ai esté en sa baillie,
mès bien m'a Deus par sa pitié gueri,
quant delivré m'a de sa seignorie.
Quant eschapez li sui sanz perdre vie,
ainz de mes euz si bone heure ne vi,
si cuit je fere oncor maint jeu parti
et maint sonet et mainte raverdie.
V.
Au conmencier se doit on bien garder
d'entreprendre chose desmesuree,
mès bone amor ne let honme apenser
ne bien choisir ou mete sa pensee.
Plus tost aime on en estrange contree,
ou on ne puet ne venir ne aler,
qu'on ne fet ce qu'on puet toz jorz trouver;
issi est bien la folie esprouvee.
VI.
Or me gart Deus et d'amor et d'amer
fors de Celi, cui on doit aourer,
ou on ne puet faillir a grant soudee.