I.
Savez por quoi Amors a non amors,
qui ne grieve fors les siens soulement?
Qui le savra s'en die son talant,
car je nel sai, se Deus me doint secors!
Amors semble deable qui maistrie:
plus engigne celui qu'en li se fie;
et poise m'en, se j'aie ja merci,
plus que por moi cent mile tanz por li,
quant on la puet rester de felonnie.
II.
Je sui touz siens et s'en sent les dolors,
et me poise de son mal durement,
et en son bien cuit mon avancement,
car de seignors vient granz biens a plusors;
et cil sert bien son seignor qui chastie,
a cui poise, quant il fait vilenie.
Mais Amors n'a cure de nul chasti,
car ele a tant et veü et oï
que ne li chaut de rien que on li die.
III.
Amors m'a fait tantes foiz corrocier
qu'en mon corrouz n'a mès point de pooir,
ainz sui plus siens, quant plus me desespoir.
Ausi con cil qui delez le foier
gist malades et ne se puet desfendre
et menace la gent par mi a fendre,
ausi di je ce por moi desenfler.
Il fait grant bien, quant on en ot parler;
mieuz en puet on l'assaut d'Amors atendre.
IV.
Se je m'en duil, ne fait a merveillier,
que Deus la fist pour gent faire doloir.
La ou Amors la m'amena veoir
oi je adès un tres douz atochier
qu'ele me fist de sa blanche main tendre,
quant par la main me prist au salu rendre.
Mieuz aim la main dont me volt adeser
que l'autre cors ou ce me fait penser,
car dou confort set Amors as siens rendre.
V.
Qui set amer, il savroit bien haïr,
se il voloit, plus que nus autres hom,
mais n'est pour ce loiautez ne raison,
qui bien aime, qu'il en doie partir;
ainz doit chascuns amer sa renonmee.
Et se Amors estoit bien apensee,
ele donroit a fin ami loial
joie et secors pour sosfrir trop grant mal;
ensi seroit servie et honoree.
VI.
Dame, merci! La mains enbausemee
que nuit e jor bais cent fois d'un estal
me fait parler de vos si a cheval
qu'il m'est vis que merci ai trouvee.