Wallensköld

Versione stampabilePDF version

I.
Robert, veez de Perron 
conme il a le cuer felon, 
qu'a un si loigtaing baron 
veut sa fille marïer, 
qui a si clere façon 
que l'en s'i porroit mirer!
  
II.
Hé, Deus! Con ci faut reson! 
Veez du vis de fuiron! 
Gente de toute façon, 
or vos en voi je mener. 
Robert, ne vaut un bouton 
qui si l'en lera aler.

III.  
- Sire, vos doit on blasmer, 
s'ensi l'en lessiez mener. 
Ce que tant poëz amer 
et ou avez tel pouoir 
n'en devez lessier aler 
pour terre ne pour avoir.
  
IV.
Mult par avroiz le cuer noir, 
quant vous en savroiz le voir. 
N'avroiz force ne pouoir 
de li veoir ne sentir; 
et sachiez: si bel avoir 
doit on près de lui tenir.
  
V.
- Robert, je vueil melz morir, 
s'il li venoit a plesir, 
que l'en lessasse partir 
pour trestoute ma conté. 
Hé, las! Qui porroit gesir 
une nuit lez son costé!
 
VI. 
- Sire, Deus vous dont joïr 
de ce qu'avez desirré!
  
VII.
- Robert, je m'en crien morir, 
quant il l'ont fet, mau gré Dé!