I.
Por conforter ma pesance
faz un son.
Bons ert, se il m'en avance,
car Jason,
cil qui conquist la toison,
n'ot pas si grief penitance.
E! é! é!
II.
Je meïsmes a moi tence,
car reson
me dit que je faz enfance,
quant prison
tieng ou ne vaut raençon;
si ai mestier d'alejance.
E! é! é!
III.
Ma dame a tel conoissance
et tel renon
que g'i ai mis ma fiance
jusqu'en son.
Meus aim, que d'autre amor don
un regart, quant le me lance.
E! é! é!
IV.
Melz aim de li l'acointance
et le douz non
que le roiaume de France.
Mort Mahon!
qui d'amer qiert acheson
por esmai ne pour dotance!
E! é! é!
V.
Bien ai en moi remenbrance
a conpaignon;
touz jorz remir sa senblance
et sa façon.
Aiez, Amors, guerredon!
Ne sosfrez ma mescheance!
e! é! é.
VI.
Dame, j'ai entencion
que vos avroiz conoissance.
e! é! é!