I.
Les douces dolors
et li mal plesant
qui viennent d'amors
sont douz et cuisant,
et qui fet fol hardement
a paines avra secors.
G'en fis un dont la poors
me tient el cors que g'en sent.
II.
Bien est grant folors
d'amer loiaument.
Qui porroit aillors
changier non talent!
Hé, Deus! G'en ai apris tant
q'ançois seroit une tors
portee a terre de flors
qu'on m'en veïst recreant.
III.
Lonc respit m'ont mort
et grant desirrier
et ce qu'a son tort
me veut corrocier.
Mains en fera a prisier,
se je n'ai de li confort,
qu'el mont n'a chose si fort
por li ne me fust legier.
IV.
Je chant et deport
pour moi solacier
et voi en ma sort
ennui et dangier,
si porrai bien perillier
quant ne puis venir a port,
ne je n'ai aillors resort
sanz ma lejance brisier.
V.
Dame, j'ai tout mis
- et cuer et penser -
en vous et assis
sanz ja remuër.
Se je voloie aconter
vostre biauté, vostre pris,
j'avroie trop anemis;
por ce ne m'en os parler.
VI.
Dame, je n'i puis durer,
car tout adès m'ira pis,
tant que vous dïez: - amis,
je vous vueil m'amor donner -.