I.
J'aloie l'autrier errant
sanz conpaignon
seur mon palefroi, pensant
a fere une chanson,
quant j'oï, ne sai conment,
lez un buisson
la voiz du plus bel enfant
c'onques veïst nus hon;
et n'estoit pas enfes si
n'eüst quinze anz et demi,
n'onques nule riens ne vi
de si gente façon.
II.
Vers li m'en vois maintenant,
mis l'a reson:
- Bele, dites moi conment,
pour Dieu, vous avez non! -
Et ele saut maintenant
a son baston:
- Se vous venez plus avant
ja avroiz la tençon.
Sire, fuiez vous de ci!
N'ai cure de tel ami,
que j'ai mult plus biau choisi,
qu'en claime Robeçon. -
III.
Quant je la vi esfreer
si durement
qu'el ne me daigne esgarder
ne fere autre senblant,
lors conmençai a penser
confaitement
ele me porroit amer
et changier son talent.
A terre lez li m'assis.
quant plus regart son cler vis,
tant est plus mes cuers espris,
qui double mon talent.
IV.
Lors li pris a demander
mult belement
que me daignast esgarder
et fere autre senblant.
Ele conmence a plorer
et dist itant:
- je ne vos puis escouter;
ne sai qu'alez querant. -
vers li me trais, si li dis:
- ma bele, pour Dieu merci! -
ele dist, si respondi:
- ne faites pour la gent! -
V.
Devant moi lors la montai
de maintenant
et trestout droit m'en alai
vers un bois verdoiant.
Aval lesprez regardai,
s'oï criant
Deus pastors par mi un blé,
qui venoient huiant,
et leverent un grant cri.
Assez fis plus que ne di:
je la les, si m'en foï,
n'oi cure de tel gent.