I.
Empereor ne roi n'ont nul pouoir
envers Amors, ice vous vueil prouver:
il puënt bien doner de leur avoir,
terres et fiez, et mesfez pardoner,
mès Amors puet honme de mort garder
et doner joie qui dure,
plaine de bone aventure.
II.
Amors fet bien un honme melz valoir,
que nus fors li ne porroit amender;
le grant desir done du douz voloir,
tel que nus hons ne puet autre penser.
Seur toute riens doit on Amors amer;
en li ne faut fors mesure
et ce qu'ele m'est trop dure.
III.
S'Amors vosist guerredoner autant
conme ele puet, mult fust ses nons a droit,
mès el ne veut, dont j'ai le cuer dolent,
qu'ensi me tient sanz guerredon destroit;
et sui cil, quels que la fins en soit,
qui a li servir s'otroie.
Empris l'ai, n'en recrerroie.
IV.
Dame, avra ja bien qui merci atent?
vous savez bien de moi au parestroit
que vostres sui, ne puet estre autrement;
je ne sai pas se ce mai me feroit.
De tant d'essais fetes petit d'esploit,
que, se je dire l'osoie,
trop me demeure la joie.
V.
Je ne cuit pas q'il onques fust nus hon
qu'Amors tenist en point si perilleus.
Tant m'i destraint que g'en pert ma reson;
bien sent et voi que ce n'est mie a gieus.
quant me moustroit ses senblanz amoreus,
bien cuidai avoir amie,
mès oncor ne l'ai je mie.
VI.
Dame, ma mort et ma vie
est en vous, que que je die.
VII.
Raoul, cil qui sert et prie
avroit bien mestier d'aïe.