I.
De nouviau m'estuet chanter
el tens que plus sui marriz.
Quant ne puis merci trouver,
bien doi chanter a enviz;
ne je n'os a li parler;
de ma chanson faz mesage,
que tant est cortoise et sage
que ne puis aillors penser.
II.
Se je peüsse oublïer
sa biauté et ses bons diz
et son tres douz esgarder,
bien peüsse estre gueriz;
mès n'en puis mon cuer oster,
tant i pens de fin corage.
Espoir s'ai fet grant folage,
mès moi l'estuet endurer.
III.
Chascuns dit q'il muert d'amor,
mès je n'en qier ja morir.
Melz aim sousfrir ma dolor,
vivre et atendre et languir,
qu'ele me puet bien merir
mes maus et ma consieurree.
N'aime pas a droit qui bee
q'il l'en porroit avenir.
IV.
Dame, qui a grant poor
souvent l'estuet esbahir
et penser a tel folor
dont je ne me puis tenir.
S'il est a vostre plesir,
s'iert bien ma paine sauvee,
que sol de la desirree
me fet mon cuer resbaudir.
V.
Nus ne puet grant joie avoir
s'il ne ra des maus apris.
Qui touz jorz fet son voloir
a poine ert ja fins amis.
Pour ce fet Amors doloir
qu'ele veut guerredon rendre
ceus qui bien sevent atendre
et servir a son voloir.
VI.
Dame, de tout mon pouoir
m'otroi a vous sanz contendre,
que sanz vous ne me puet rendre
nus biens ne ne puet valoir.