I.
De chanter ne me puis tenir
de la tres bele esperitaus,
que riens du mont ne puet servir
qui ja viengne honte ne maus;
que li Rois celestïaus,
qui en li daigna venir,
ne porroit mie sousfrir
qui la sert q'il ne fust saus.
II.
Quant Deus tant la vout obeïr,
qui n'estoit muables ne faus,
bien nos i devons dont tenir,
Dame roïne naturaus!
cil qui vous sera fëaus,
vous li savroiz bien merir;
devant vos porra venir
plus clers qu'estoile jornaus.
III.
Vostre biauté, qui si resplent,
fet tout le monde resclarcir.
par vous vint Deus entre la gent
en terre pour la mort sousfrir
et a l'Anemi tolir
nos et geter de torment.
Par vous avons vengement
et par vous devons garir.
IV.
David le sout premierement
que de lui devïez oissir,
quant il parla si hautement
par la bouche du Saint Espir.
Vous n'estes mie a florir,
ainz avez flor si poissant:
c'est Deus, qui onques ne ment
et par tout fet son plesir.
V.
Dame, plaine de granz bontez,
de cortoisie et de pitié,
par vous est touz renluminez
li mondes, nès li renoié;
quant il seront ravoié
et crerront que Deus soit nez,
seront sauf, bien le savez.
Dame, aiez de nos pitié!
VI.
Douce Dame, or vos pri gié
merci, que me desfendez
que je ne soie dampnez
ne perduz par mon pechié!