Wallensköld

Versione stampabilePDF version

I.
Dame, cist vostre fins amis,
qui tout son cuer a en vous mis
- de vos amer est si sorpris
que de jor et de nuit est pris -,
vos mande que sachiez de voir
q'il vous aime sanz decevoir;
en vos amer n'a pas mespris.
  
II.
Dame, quant de vous me souvient,
une tel joie au cuer me vient,
qu'Amors me lace, qui me tient.
Vostre douz regarz me soustient,
qui soëf m'a le cuer enblé;
et souvent me ra il senblé
que de vous toute joie vient.
  
III.
Amors, aiez de moi merci,
que mon cuer, qui n'est mie ci,
fetes joiant, et prïez li
que il li souviengne de mi!
Mès certes vous n'en feroiz rien,
que je vous aim seur toute rien;
pour ce sel metroiz en oubli.
  
IV.
Onques nus ne vos ama tant
com je faz, qui touz jorz entent
a vos servir veraiement.
Pour ce sont perdu li amant
que trop leur fetes acheter
ce dont il devroient chanter.
Deus! si fetes pechié trop grant.
  
V.
Dame, merci, merci cent foiz!
pitiez vous praingne a ceste foi
de moi, qui sui ensi destroiz
pour vous qu'or sui chauz, or sui froiz,
or chant, or plor et or souspir.
je conmant a vos mon espir;
ne sai se merci en avroiz.