Wallensköld

Versione stampabilePDF version

I.
Au tens plain de felonnie, 
d'envie et de traïson, 
de tort et de mesprison, 
sanz bien et sanz cortoisie, 
et que entre nos baron 
fesons tout le siecle empirier, 
que je voi esconmenïer 
ceus qui plus offrent reson, 
lors vueil dire une chanson.
  
II.
Li roiaumes de Surie 
nos dit et crie a haut ton, 
se nos ne nos amendon, 
pour Dieu! Que n'i aions mie: 
n'i ferions se mal non. 
Deus aime fin cuer droiturier, 
de teus genz se veut il aidier; 
cil essauceront son non 
et conquerront sa meson.
  
III.
Oncor aim melz toute voie 
demorer el saint païs 
que aler povre, chetis 
la ou ja solaz n'avroie. 
Phelipe, on doit Paradis 
conquerre par mesaise avoir, 
que vous n'i trouverez ja, voir, 
bon estre ne geu ne ris, 
que vous avïez apris.
  
IV.
Amors a coru en proie 
et si m'en maine tout pris 
en l'ostel, ce m'est a vis, 
dont ja issir ne querroie, 
s'il estoit a mon devis. 
Dame, de qui Biautez fet hoir, 
je vous faz or bien a savoir: 
ja de prison n'istrai vis, 
ainz morrai loiaus amis.
  
V.
Dame, moi couvient remaindre, 
de vous ne me qier partir. 
De vous amer et servir 
ne me soi onques jor faindre, 
si me vaut bien un morir 
l'amors qui tant m'asaut souvent. 
Adès vostre merci atent, 
que biens ne me puet venir, 
se n'est par vostre plesir.
  
VI.
Chanson, va moi dire Lorent 
qu'il se gart bien outreement 
de grant folie envaïr, 
qu'en lui avroit faus mentir!