I.
Ausi conme unicorne sui,
qui s'esbahist en regardant,
quant la pucele va mirant.
tant est liee de son ennui,
pasmee chiet en son giron;
lors l'ocit on en traïson.
et moi ont mort d'autel senblant
Amors et ma dame, por voir:
mon cuer ont, n'en puis point ravoir.
II.
Dame, quant je devant vous fui
et je vous vi premierement,
mes cuers aloit si tressaillant
Qu'il vous remest, quant je m'en mui.
Lors fu menez sanz raençon
en la douce chartre en prison
dont li piler sont de talent
et li huis sont de biau veoir
et li anel de bon espoir.
III.
De la chartre a la clef Amors
et si i a mis trois portiers:
Biau Senblant a non li premiers,
et Biautez cele en fet seignors;
Dangier a mis a l'uis devant,
un ort, felon, vilain, puant,
qui mult est maus et pautoniers.
Cil troi sont et viste et hardi:
mult ont tost un honme saisi.
IV.
Qui porroit sousfrir les tristors
et les assauz de ces huissiers?
onques Rollanz ne Oliviers
ne vainquirent si granz estors;
il vainquirent en conbatant,
mès ceus vaint on humiliant.
Sousfrirs en est gonfanoniers;
en cest estor dont je vous di
n'a nul secors fors de merci.
V.
Dame, je ne dout mès riens plus
que tant que faille a vous amer.
Tant ai apris a endurer
que je sui vostre tout par us;
et se il vous en pesoit bien,
ne m'en puis je partir pour rien
que je n'aie le remenbrer
et que me cuers ne soit adès
en la prison et de moi près.
VI.
Dame, quant je ne sai guiler,
merciz seroit de seson mès
de soustenir si greveus fès.