Tischler

Versione stampabilePDF version

I.
Bele Ysabiauz, pucele bien aprise, 
ama Gerart et il li en tel guise 
c'ainc de folour par lui ne fu requise; 
ainz l'ama de si bone amour 
que mieuz de li guarda s'onour. 
Et joie atant Gerart.

II.
Quant pluz se fu bone amours entr'eus mise, 
par loiauté afermee et reprise, 
en cele amour la demoisele ont prise 
si parent et douné seignour 
outre son gré, un vavassour. 
Et joie atent Gerart.

III.
Quant sot Gerars, cui fine amour justise, 
que la bele fu a seigneur trasmise, 
grains et mariz fist tant par sa maistrise 
que a sa dame en un destour 
a fait sa plainte et sa clamor. 
Et joie atent Gerart.

IV.
- Amis Gerart, n'aiez ja couvoitise 
de ce voloir dont ainc ne fui requise. 
Puis que je ai seigneur qui m'aimme et prise, 
bien doi estre de tel valour 
que je ne doi penser folour. - 
Et joie atent Gerart.

V.
- Amis Gerart, faites ma conmandise: 
ralez vous ent, si feroiz grant franchise. 
Morte m'avriez s'od vous estoie prise. 
maiz metez vous tost u retour; 
je vous conmant au Creatour. - 
Et joie atent Gerart.

VI.
- Dame, l'amour qu'ailleurs avez assise 
deüsse avoir par loiauté conquise. 
Maiz pluz vous truis dure que pierre bise, 
s'en ai au cuer si grant dolour 
qu'a biau samblant souspir et plour. - 
Et joie atent Gerart.

VII.
- Dame, pour Dieu, - fait Gerars sanz faintise, 
- aiez de moi pitié par vo franchise! 
la vostre amour me destraint et atise 
et pour vous sui en tel errour 
que nus ne puet estre en greignour. - 
Et joie atent Gerart.

VIII.
Quant voi Gerars, qui fine amour justice, 
que sa dolour de noient n'apetice, 
lors se croisa 
de duel et d'ire esprise, 
et pourquiert einsi son atour 
que il puist movoir a brief jour. 
Et joie atent Gerart.

IX.
Tost muet Gerars, tost a sa voie quise; 
avant tramet son esquïer Denise 
a sa dame parler par sa franchise. 
La dame ert ja pour la verdour 
en un vergier cueillir la flour. 
Et joie atent Gerart.

X.
Vestue fu la dame par cointise; 
mout ert bele, grasse, gente et alise; 
Le vis avoit vermeil come cerise. 
- Dame, - dit il, - que tres bon jour 
vous doint cil qui j'aim et aour! - 
Et joie atent Gerart.

XI.
Ses maris voit la folour entreprise; 
pour voir cuide la dame morte gise 
les son ami. tant se het et desprise 
qu'il pert sa force et sa vigour 
et muert de due en tel errour. 
Et joie atent Gerart.

XII.
- Dame, pour Deu, - fait Gerars sanz faintise, 
- d'outre mer ai pour vous la voie emprise. - 
la dame l'ot, mieus vousist estre ocise. 
Si s'entrebaisent par douçour 
qu'andui cheïrent en l'erbour. 
Et joie atent Gerart.

XIII.
De pasmoisons lievent par tel devise 
qu'il firent faire au mort tout son servise. 
Li deus remaint. Gerars par sainte eglise 
a fait de sa dame s'oissou 
ce tesmoignent li ancissour. 
Or a joie Gerart.