I.
Au conmencier de ma nouvele amor
ferai chanson, car pris m'en est talent;
si prïerai ma dame, qui j'aor,
a qui je sui du tout obediant.
Pour Dieu li pri qu'el ne soit desdaignant;
ainz doit vouloir que de moi soit servie,
si en serai plus liez toute ma vie.
II.
Ce ne me doit nus tenir a folor,
se je desir estre son bienvoillant,
puis que biauté fist de li mireor
et en touz biens sont si entendement.
Deus, tant serai renvoisiés et joiant,
se ja nul jor envers moi s'umilie
que par son gré l'ose apeler amie.
III.
Tant me delis en l'espoir qu'en li ai
si doucement q'il m'est souvent avis
qu'ele m'otroit s'amor de cuer verai;
mes tost me rest cil douz espoir failliz.
De poor sui iriez et esbahis
et dout reson, se ele i met s'entente;
sanz estre amez cuit morir en atente.
IV.
Et nepourquant touz jorz la servirai,
sanz fausseté, conme loiaus amis,
car mes fins cuers ne doit estre avec moi,
puis que il s'est en si haut lieus assis;
ainz doit penser conment soit deserviz
li tres grant bien ou il m'a mis s'entente,
ne ja por mal q'il ait ne s'en repente.
V.
Il m'est avis, qui a droit veut jugier,
que nus ne doit de bone Amour partir,
qu'en pou d'eure rent ele tel loier
que nus n'avroit povoir de deservir.
Pour ce la vueil bonement obeïr
et vueil proier a ma dame honoree
qu'avec biautez soit pitiez assenblee.
VI.
Quens de Ghelre, rienz ne puet avancier
tant com amours celui qui a lui bee;
entendez i, s'iert vostre honor doublee.