I.
Amours par sa courtoisie
M'a .i. mignot sens doné
De faire chançon jolie,
Si chant par sa volenté
5 En espoir d'avoir amie:
C'est la riens c'ai covoitie
Plus tous jours et desirré
Sans nul voloir de folie.
II.
J'aim dame bien ensegnie
10 Et plaine de grant bonté,
Tant est de valour garnie
Ke je n'aroie conté
Jamais ses bien a moitie;
Che me fait vivre a haskie:
15 Ke n'a cuer entalenté
De nostre amour faire onie.
III.
Si tost con je l'euć choisie
Me fist .i. assaut privé
De ses iex ki m'ont ravie
20 Si trestoute ma santé,
Ke s'a moi ne s'umelie
Par pitié, pour riens c'on die,
N'iere mais jour sans grieté,
Tant l'aim d'amour enasprie.
.ii. 16 honie con h erasa .iii. 24. SP. en asprie