Saba

Versione stampabilePDF version

I.
Lou samedi a soir, fat la semainne, 
Gaiete et Orïour, serors germainnes, 
main et main vont bagnier a la fontainne. 
Vante l'ore et li raim crollent: 
ki s'antraimment soweif dorment.

II.
L'anfes Gerairs revient de la cuitainne, 
s'ait chosie Gaiete sor la fantainne, 
antre ces bras l'ait pris, soueif l'a strainte. 
Vante l'ore et li raim crollent: 
ki s'antraimment soweif dorment.

III.
- Quant avras, Orrïour, de l'ague prise, 
reva toi an arriere, bien seis la vile; 
je remanrai Gerairt ke bien me priset. - 
Vante l'ore et li raim crollent: 
ki s'antraimment soweif dorment.

IV.
Or s'en vat Orïous, teinte et marrie; 
des euls s'an vat plorant, de cuer sospire, 
cant Gaiete sa suer n'anmoinnet mie. 
Vante l'ore et li raim crollent; 
ki s'antraimment soweif dorment.

V.
- Laise, - fait Orïour, - com mar fui née! 
J'ai laxiet ma serour an la vallée. 
L'anfes Gerairs l'anmoine an sa contrée. 
vante l'ore et li raim crollent: 
ki s'antraimment soweif dorment.

VI.
L'anfes Gerairs et Gaie s'an sont torneit; 
lor droit chemin ont pris vers la citeit 
tantost com il i vint, l'ait espouseit. 
Vante l'ore et li raim crollent: 
ki [s'antraimment soweif dorment.]