I.
Quant voi renverdir l'arbroie
que li tens d'estey revient,
d'une amor qui me maistroie
et en grant dolor me tient
volentiers me complaindroie,
quant il me sovient
que je ne porroie
müer ce qu'estre covient.
II.
Si covient qu'en Amors croie,
qu'ele me garde et maintient;
nonporquant sovent s'esfroie
fins cuers qui tel fais soutient;
trop me desconforteroie,
mais mout me retient
mes duelx et ma joie
qu'en li va et de li vient.
III.
Bele et bone, simple et sage,
dame qui mon cuer avez,
ne me tenez a folage
ce que trop haut sui montez;
se mi dui droit seignorage,
Amors et Beautez,
m'en font faire outrage,
por Deu moi le pardonez.
IV.
Amors ne quiert haut parage
ne richece ne fiertez,
mais se donne en fin corage
et i met totes bontez.
Ses douz espirs, par usaige
de grace donnez,
donte le sauvage,
atempre les destemprez.
V.
Amors veint par sa poissance
toute riens, bien le savez;
cuens ne dus ne rois de France
ne nuns, tant soit hauz levez,
n'est en si bone cheance
ne tant honorez
com cil sanz dotance
qui bien aimme et est amez.
VI.
Douce amors, douce esperance,
douce volentez,
en vostre creance
croi que je serai sauvez.