I.
Pensis d'Amours vueill retraire
conment li miens cuers me maine,
qu'a son plesir m'estuet faire
ce dont j'ai anui et paine;
trop me fait ma doleur plaire,
s'en tieig Amour a vilainne
qui m'ocit en son servise,
qui touz sui a sa devise.
II.
Ma doleur me convient taire
et servir Amour certaine,
que tous mes pensers repaire
a estre li suens, demainne.
Se cele m'est debonaire
qui de tous bons sens est plainne,
tel joie avroie conquise
qui ja n'iert par moi requise.
III.
Amours dechiet et empire
par fausse gent nouveliere;
pour ce en trai grief martire
que suens sui a ma maniere.
L'en ne porroit pas bien dire
si grant doleur en proiere,
com el s'est en mon cuer mise,
de li amer sanz faintise.
IV.
Ma volentez trait et tire
la u on la tient mainz chiere;
maiz ne me doi escondire
de rienz qu'Amours me requiere.
Je cuit que me veut ocirre
d'esperance mençongiere;
maiz a servir l'ai emprise,
sel ferai jusqu'al juïse.
V.
De li ne partirai mie
pour ennui ne pour pesance;
et cil qui pluz m'en chastie
ne veut pas ma delivrance,
qu'Amours a grant seignorie
seul d'amembrer sa samblance.
Pour ce sui en son servise
ja m'en a joie pramise.
VI.
Du tout sui en sa baillie;
mal fera s'el ne m'avance;
ne ja pour rienz que nus die
n'avrai ailleurs ma fiance,
ainz morrai, se ne m'aïe,
en ceste longe atendance.
Servir la vueill a sa guise
tant que Amours l'ait esprise.
VII.
Odins, lonc tanz l'a enquise
Gassos, qui tant l'eime et prise.