Petersen Dyggve

Versione stampabilePDF version

I.
Quant fine Amours me proie que je chant,
chanter m'estuet, que je nel puis laissier,
quar je sui si en son conmandement
qu'en moi n'a maiz desfense ne dangier.
Se la bele, cui je n'os maiz proier,
n'en a merci et pitiez ne l'en prent,
morir m'estuet amourous en chantant.
 
II.
Morir m'estuet s'Amours le me consent,
quar sanz Amours ne me puet rienz aidier;
et quant de li vienent tuit mi tourment,
bien me devroit mes doleurs alegier.
Pour ce li proi qu'ele vueille essaier
s'ele a pooir vers celi qui j'aim tant,
par proiere ne par conmandement.
 
III.
Tuit mi desir et tuit mi fin talent
viennent d'Amours, c'onques ne seu trichier,
ainz seu amer si esmereement,
douce dame, qui ja ne quier changier.
Des icel jour que vous seu acointier,
vous donai si cuer et cors et talent
que rienz fors vous ne me feroit joiant.
 
IV.
Quant si me sui affinez finement
en fine amour, qu'autre deduit ne quier
(ne fins amis ne doit vivre autrement,
maiz qu'il n'en puist partir ne esloignier),
se bien amer me puet avoir mestier,
j'avrai joie de vostre biau cors gent,
bele et bonne, de douz acointement.
 
V.
Se Diex me doint rienz que je li demant,
u mont n'a rienz qui tant face a proisier
con cele fait de qui ma chanson chant.
De grant valour et de bon pris entier
plus puet valoir c'on ne puist souhaidier.
Or me doint Diex amer et servir tant
qu'aie merci, quar merci vois querant.
 
VI.
Par Dieu, Gillés, bien me puis afichier
que j'aim del mont toute la melz vaillant,
la pluz courtoise et la pluz avenant.
 
VII.
Chansons, va t'en, guarde ne te targier,
et di Noblet que cuers qui se repent
ne sent mie ce que li miens cuers sent.