Petersen Dyggve

Versione stampabilePDF version

​I.
Pour mal temps ne por gelee
ne lairai que je ne chant,
car ensi vois ma pensce
et mon mal reconfortant.
de la bele cui j'aing tant
me vient si granz desirree
quant plus l'aloing, plus la vuil.
Je l'aing plus que je ne sueil,
més pou la voi, si m'en duil.
 
II.
Quant primes l'oi esgardee,
tant la vi bele et plaisant
que je l'ai des lors amee
et amerai mon vivant.
Ma mort pris en resgardant:
se s'amors ne m'est donnee,
Dex! mar la virent mi huil.
Je l'aing plus que je ne sueil,
més pou la voi, si m'en duil.
 
III.
Mainte douce remembree
fais de li en sopirant.
Li pensers tant m'en agree
que toz m'en vois obliant
qu'Amors me remet devant
sa grant biauté esmeree
et son amorous acueil.
Je l'aing plus que je ne sueil,
més pou la voi, si m'en duil.
 
IV.
Ja par moi n'iert oblïee,
mais je ne sai s'ele i sent
por ce que tant l'ai amee,
s'ele aint mon avancement
et s'ele fait autre amant.
Ja n'avrai longue duree,
s'ele me torne a orgueil.
Je l'aing plus que je ne sueil,
més pou la voi, si m'en duil.
 
V.
Ce m'ocit qu'en sa contree
n'os aler a mon talant
por la gent malaüree
qui toz jors vont devinant.
Loing de li remain pensant,
s'en trai dure consirree
que sovent mes eulz en mueil.
Je l'aing plus que je ne sueil,
més pou la voi, si m'en duil.
 
VI.
Bele et bone, de vos chant
et pans en vos a jornee
et la nuit, quant me despoil.
 
VII.
Bochart, ce me fait pensant
que n'est pas dou mal grevee
dont je sopir a Nantueil.