I.
Les oiseillons de mon païs
ai oïs en Bretaigne.
a lor chant m'est il bien avis
q'en la douce Champaigne
les oï jadis,
se n'i ai mespris.
Il m'ont en si dolz panser mis
k'a chanson faire me sui pris
tant que je parataigne
ceu q'Amors m'a lonc tens promis.
II.
De longe atente m'esbahis
senz ce que je m'en plaigne.
Ce me tout le jeu et le ris,
que nus q'Amors destrangne
n'est d'el ententis.
mon cors et mon vis
truis si mainte foiz entrepris
qu'un fol samblant i ai apris.
Ki q'en Amors mespregne,
ainc, certes, plus ne li mesfis.
III.
En baisant, mon cuer me ravi
ma dolce dame gente;
trop fu fols quant il me guerpi
por li qui me tormente.
Las! ainz nel senti,
qant de moi parti;
tant dolcement lo me toli
k'en sospirant lo traist a li;
mon fol cuer atalente,
mais ja n'avra de moi merci.
IV.
D'un baisier, dont me menbre si,
m'est avis, en m'entente,
k'il n'est hore, ce m'a trahi
q'a mes levres nel sente.
Quant ele soffri,
Deus! ce que je di,
de ma mort que ne me garni!
ele seit bien que je m'oci
en ceste longe atente,
dont j'ai lo vis taint et pali.
V.
Por coi me tout rire et juer
et fait morir d'envie;
trop sovent me fait conparer
Amors sa conpaignie.
Las! n'i os aler,
que por fol sambler
me font cil fals proiant damer.
Morz sui quant jes i voi parler;
que point de trecherie
ne puet nus d'eus en li trover.