I.
L'autrier estoie en un vergier,
s'oï deus dames consoillier,
tant qu'eles pristrent a tancier
et lor paroles a haucier;
acotez fui lez un rosier
desoz une ente florie.
Dist l'une a l'autre: – consoil quier
d'un mauvais qui m'ainme et prie
pour loier;
amerai je tel chevalier
coart por sa menantie?
II.
Uns autres me refait proier
frans et cortois et beau parlier,
et quant il reva tornoier
en son païs, moillor ne quier;
sages est et tient son cors chier
sanz orguil et sanz folie;
mais il n'avroit d'amors mestier
qui tort a mercheandie.
Au premier
li fui cruelx a l'acointier,
por le mauvais qui me prie. –
III.
Dit la bone: – Je di par droit
que tres bele dame amer doit
bon chevalier s'ele aperçoit
que fins et lëaus vers li soit;
et cele cui avoirs deçoit
dame ne l'apel je mie:
garce est, puis que l'on seit et voit
que por loier s'est honie.
Qui la croit
fox est et sa folie boit,
quant de l'argent l'a saisie –.
IV.
Dit la fause: – Qui vos creroit
de mesaise et de fain morroit;
n'aing pas chevalier qui tornoit
et erre et despent et acroit
et en yver se muert de froit
quant sa creance est faillie;
ne quier que mes druz peceoit
grosse lance por s'amie;
orendroit
prenez l'onor et je l'esploit:
si verrons la mieuz garnie.
V.
– Tais toi, pute, va bordeler;
je ne te puis plus escouter.
puis que tu vuez a mal aler,
nuns ne t'en porroit destorber.
Coment porras tu endurer
en ton lit vil conpaignie? –
li voloit l'un des eulz crever,
mais Gaces nou soffri mie
au torner,
ainz li ala des poins oster:
de tant fist il vilenie.