I.
De bien amer grant joie atent,
car c'est ma greigneur envie;
et sachiez bien certainnement
qu'Amours a tel seignourie
qu'au double guerredon en rent
celui qui en li se fie;
et cil qui d'amer se repent
s'est bien traveilliez pour noient.
II.
Onques ne fis a escïent
contre Amor sens ne folie,
ainz sui a son conmandement
et serai toute ma vie.
Cil remaint anuieusement
de cui Amours s'est partie.
dame si m'enseigne et aprent
qu'onours est d'amer loiaument.
III.
Cele est de douz acointement
et de bone conpaigne,
et sage entre anuieuse gent,
qui de mon cuer est saisie.
Senz et biautez en li s'estent,
si het toute vilenie,
fors que trop me grieve sovent;
maiz ne set mie que je sent.
IV.
Granz amours ne me puet grever:
quant pluz m'ocit, pluz m'agree;
et mieuz aim morir et amer
qu'un seul jor l'aie oublïee.
Dame, qui me poez doner
ma grant joie desirree,
ce me fait souvent souspirer
qu'anuious font ennui cuider.
V.
Dame, de toutes la nomper,
bele et bone, a droit loee,
ja ne devrïés escouter
fausse gent maleüree;
qu'a mentir et a deviner
ont mainte amour dessevree,
qui puis ne savoit assener
la u ele deüst aler.
VI.
Dame, onques ne vous seu celer
mon desir ne ma pensee;
ainz vous ain de cuer sanz fausser
pluz que nule autre riez nee;
a vous servir et honorer
ai si m'amour atournee
que ne puis, sanz merci trover,
ne loinz guerir, ne pres durer.
VII.
Quens de Blois, sanz einsi amer
ne puet nus en grant pris monter.
VIII.
Du Barrois vous doit remembrer,
qu'amours fet les bons amender.