I.
Ara·m platz, Giraut de Borneill,
que sapcha per c’anatz blasman
trobar clus, ni per cal semblan.
Aiso·m digaz,
si tan prezatz
so que es a toz comunal;
car adonc tut seran egual.
II.
Seign’ En Lignaura, no·m coreill
si qecs s’i trob’ a son talan.
Mas eu son jujaire d’aitan
qu’es mais amatz
e plus prezatz
qui·l fa levet e venarsal;
e vos no m’o tornetz a mal.
III.
Giraut, non voill qu’en tal trepeil
torn mos trobars; que ja ogan
lo lauzo·l bon e·l pauc e·l gran.
Ja per los faz
non er lauzatz,
car non conoisson (ni lor cal)
so que plus car es ni mais val.
IV.
Lingnaura, si per aiso veil
ni mon sojorn torn en affan
sembla que·m dopte del mazan.
A que trobatz
si non vos platz
c’ades o sapchon tal e cal?
Que chanz non port’ altre cabtal.
V.
Giraut, sol que·l miels appareil
e·l dig’ ades e·l trag’ enan,
mi non cal sitot non s’espan.
C’anc granz viutaz
non fon denhtatz:
per so prez’ om mais aur que sal,
e de tot chant es atretal.
VI.
Lingnaura, fort de bon conseill,
etz fis amans contrarian,
e per o si n’ai mais d’affan.
Mos sos levatz,
c’us enraumatz
lo·m deissazec e·l diga mal,
que no·l deing ad home sesal.
VII.
Giraut, per cel ni per soleil
ni per la clardat que resplan,
non sai de que·ns anam parlan,
ni don fui natz,
si soi torbatz
tan pes d’un fin joi natural.
Can d’als cossir, no m’es coral.
VIII.
Lingnaura, si·m gira·l vermeil
de l’escut cella cui reblan,
qu’eu voill dir: “A Deu mi coman.”
Cals fols pensatz
outracuidatz!
M’a mes doptanza deslial!
No·m soven com me fes comtal?
IX.
Giraut, greu m’es, per San Marsal,
car vos n’anatz de sai nadal.
X.
Lingnaura, que ves cort rial
m’en vauc ades ric e cabal.