Pattison

Versione stampabilePDF version

I.
Si de trobar agues melhor razo           
que ieu non ai, sapchatz que me plairia; 
mas tal com l’ai farai gaya chanso,      
si far la sai tal qu’elha fos grazia     
per ma dompna que no me denh entendre.   
E tenc me rics qu’alhors no puesc atendre,
e platz m’i mais viure desesperatz        
que si eu fos per altra domn’ amatz.      

II.
Viure m’es greu, e murir no·m sap bo.     
Que farai doncx? Amarai m’enemia?         
Amar la dei se non fas falhizo;           
qu’Amors o vol qui m’a en sa bailia.      
Al sieu voler no me vuelh ieu defendre,   
ni enves lieis de nulha re contendre;     
ans dei ben dir qu’ieu mi tenh per pagatz 
pus que ieu fas totas sas voluntatz.      

III.
Son vol fas ieu, e quer li·n guizardo,    
que, s’a lieis platz, desamat no·m aucia, 
o que·m fezes oblidar sa faisso           
que m’es miralhs en qualque loc qu’ieu sia;
e pus Amors me vol d’amar sorprendre       
ben deuria a midons far aprendre           
com ieu pogues de lieis esser privatz —    
pueis m’auria mos mals guiardonatz.        

IV.
Trebails, maltraitz, cuida ab pensazo,     
ni guerreyars qu’ieu fas no m’en desvia    
de vos amar que·m tenetz en preizo.        
Offensio no·us fis jorn de ma via          
ni no ferai, com que m’en deia prendre;    
ni no·m faretz ad autra dompna rendre;     
que ab mon cor me sui ben acordatz         
de vos amar sia sens o foldatz.            

V.
E, non per so molt me sabria bo            
si·n fezes sen; mas sitot fauc follia,     
de tal foldat no vuelh qu’om m’ochaizo,    
quar en amar non sec hom drecha via.       
Qui gent no sap sen ab foldat despendre,   
mas cel qu’o fai se pot ben tant estendre  
qu’el er amicx sivals o drutz clamatz;     
si·n aisso falh, non er adreit jutgatz.    

VI.
A Mon Diable, qui belhs diz sap entendre,  
t’en vai, chanso, e si te denh aprendre,   
pueis poirai dir qu’eu sui ben cosselhatz  
de Mon Cosselh, qu’es d’Aurenga laissatz.