I.
Car vei qe clars
chanz s’abriva
dels aucels, e·l prims fremirs,
m’es douz e bels lor auzirs
tan qe no sai coisi·m viva
sens chantar, per qe comenz
una chansoneta gaia.
II.
E·l sols blancs, clars,
veg qe raia
cautz, greus, secs, durs et ardenz,
qe·m frain totz mos bons talens.
Mas una voluntatz gaia
d’un franc joi, qe·m mou Dezirs,
no vol c’ap flacs volers viva.
III.
Ges no m’es clars
ni m’esquiva
est jois, don faz lez sospirs,
ni sai s’anc mi valc mos dirs
ni mi noc; e tem qe·m viva
enaisi trop lonjamens
l’amors qe·il tenc meja gaia.
IV.
Mos cors es clars
e s’esmaia!
Aici vauc mestz grams·iauzens,
plens e voigz de bel comens;
qe l’una meitatz es gaia
e l’autra m’adorm Cossirs
ab voluntat mort’ e viva.
V.
C’us volers clars
qe·m caliva
m’espeing enant en Faillirs!
Mostra Temers que jauzirs
val mais al home qe viva
qe cortz gaugz; per q’espaventz
s’altempr’ ab voluntat gaia.
VI.
Vostr’amics clars
no·us essaia,
dona, ni·us mostra parvens,
cor es en vos totz sos sens.
Ni sap si l’etz dur’ o gaia!
Tant vos tem qe·l Descubrirs
l’escarz, e no sap com viva.
VII.
Que non es clars,
ab c’om pliva,
amics, ni ab genz mentirs,
si non tem so; c’a martirs
leu deu venir anz q’el viva!
C’om non ama finamenz
senes gran temensa gaia.
VIII.
Ai! francs cors clars!
Res veraia!
Domna, vailla·m Chausimenz
si eu non sui tant sapiens
qe·us sapcha, per foudat gaia,
dir so qe voil; mas Suffrirs
no·m dan si voletz qe viva.
IX.
Domna,·l meilher res qe viva!
De loing ses fuec m’escomprens
e·m donas voluntat gaia.
X.
Ai! dousa res coind’ e gaia
ara·m prosmara·l morirs
si no·m das socors com viva.