I.
Ben sai c’a sels seria fer
que·m blasmon qar tan soven chan
si lor costavon mei chantar.
Meils m’estai
pos leis plai
que·m te jai
qu’ieu no chant mia per aver:
qu’ieu n’enten en autre plazer.
II.
E per als m’en cug plus anquer:
quar tan soven com en chantan
no la puesc auzen totz nomnar.
E pueis ai
tan gran jai
quan quex brai
so qu’ieu dic, c’adonx cug tener
Dieu, o lieis don me volh temer.
III.
Bo·m sap qi de midonz m’enquier,
q’ieu no i faz ges feignien semblan;
e creis m’en gaugz cant n’aug parlar;
neus de lai
on no·s fai
noms, me trai
qant diretz de lieis tal plazer —
cossi·us n’era datz grans aver.
IV.
Gran esfort fai Dieus, qar sofer
c’ab si no la·n pueja baizan!
Mas no·m vol tolre ni tort far;
ni s’eschai
qu’en esmai
for’ieu sai.
Mas lieis no pren, no·m cal temer
que ja autr’ ill plassa tener.
V.
Si ben en amar leis m’esmer,
qu’ieu sai, que si pel mon s’espan,
c’autras m’en faran faiturar.
Don m’esglai:
qu’en farai?
Cobrirai
donx mon gran ben ab jauzen ver?
Oc! Si n’era mieus lo poder.
VI.
Mas tostems fo e tostems er
que grans amors no te guaran.
Grans meravillas son d’amar!
Que·n dirai
s’amors chai
qar van bai?
Ai las! Ja no m’o lais vezer
Sel Dieus que·m n’a datz jauzen ser!
VII.
C’aisi tiron ves man esquer
sill ric que plus cortes se fan
c’ades ponhon en lauzenjar;
e·ill verai
son en plai,
quar, i a trai,
sel c’a semblan sen ferm poder
par cortes, si nonca s’es ver.
VIII.
Dona, vostre domini ser
crezetz me, qu’ie·us am ses engan,
e membre·us plus que l’encuzar
li dous bai . . .
Ar morrai
si dic mai!
Ai! Co·m fail quan pes del dous ser
lo sens e l’auzir e·l vezer!
IX.
Quan la candela·m fetz vezer
vos baizan rizen, a! cal ser!
X.
Joglar, ades mati e ser
me tira·l cors vostre vezer.