I.
. . . . . ils hom tan . . . . . on amet
com . . . . . idons tro soa . . . . .
. . . . . emas ella soa . . . . . est
non mier . . . . . quar trop lai . . . . . t
gran tort . . . . . z tan capauc . . . . . im
. . . . . el cui hom son . . . . . ois
. . . . . . . . . . . . . . . . orsa
II.
Forsat m’a encontra devet
e tengut enclaus et encout,
si co·l leos vol la forest,
que tot quant es dedins s’espert
e non eis pel frest ni pel sim;
e fals’amor destreis m’aisi e·m pois
e·m fes anar lonc termini a orsa.
III.
Ben es vers c’a orsa·m menet,
e fis que fols quar lei ai cout,
que·l no ret gaerdo de prest,
c’aisi m’a sos fals digz cubert
que de fraiser fazia vim,
c’ab sos bels digz m’aplanet e m’enois
e mostret me com ieu de leis m’estorsa.
IV.
Estortz sui, mas aisi·m liet
ab eis lo genh ab que m’a sout,
mas ieu soi sel que no m’arest
que lai on fezeutatz se pert,
quar uns no·i a saber tan prim
que lai on ve cobe ni mois;
ni·m part de lui e vauc dretç, qui que·s torsa.
V.
Ges no·m tortz, mas d’aiso·m penet;
tant ai afilat et esmout,
qu’ieu cuidava aver conquest
ric joi, mas en ira·m revert,
que la fezeutat de Caim
trobei en leis, que tot be desconois,
per qu’ieu remanh com l’albres ses l’escorsa.
VI.
Fraire, ie·us am pueis que nos vim,
e soi sel que no·us desconois,
mas ja no vueill amor que trenc ni·s torsa.