I.
En aventure conmens
ma daerrainne chanson,
si ne sui liez ne dolens
ne ne sai se vive u non
u se j'ai tort u raison
u se j'aim u c'est neienz,
mais iteus est mes talenz
que sans nule repentance
pens a la meilleur de France.
II.
Et li tres douz pensemens
de sa tres clere façon
me fait renouvelemens
de toute joie sanz non;
maiz tant enquierent felon,
losengier et males genz!
Or l'ai ensi en pourpens
que pour mal ne pour grevance
ne savront ma mesestance.
III.
Ainc n'amai a repentir
ne ja ne le quier savoir,
ainz ai mis en li servir
cuer et cors, force et pooir;
et s'ele me fait doloir,
bien le me porra merir,
qu'ele a pooir d'aconplir
mon voloir toute ma vie,
ma tres douce chiere amie.