I.
Qant voi esté et lo tans revenir
que bois et prei conmencent a verdir,
se j'ai amé, bien m'en doit sovenir;
trop m'ont grevé cil qui m'ont fait guerpir
la riens fors Deu que plus aim et desir.
Deus! sei bel oil, sei bel oil, sei bel oil
me font amer cenz tanz que je ne suel!
II.
Tant m'ont mené del tot a lor plaisir,
contre mon gré me firent revenir;
tant m'ont duré li plor et li sospir
que sor mon pois me firent revenir;
si m'ont hasté que nel puis mais sosfrir.
Deus! si m'en duel, si m'en duel, si m'en duel,
qant perdu ai la rien que je plus vuel!
III.
Je ne puis mais longuement endurer
ceste dolor q'amors me fait porter,
ne mes fins cuers ne porroit oblier
son biau cors gent ne son vis fres et cler.
les! tant me font et veillier et penser!
Deus! sei bel oil.
IV.
El mont n'a rien qui me puist conforter,
por ceu que doie en france demorer,
ne je n'i puis longuement sejorner
qu'il ne m'estuet ou morir ou raler
savoir se Dex m'i lairoit recovrer.
Dex! tant la voil, tant la voil, tant la voil
por son solaz et por son bel aqoill!