I.
Quant li estez et la douce saisons
font foille et flour et les prés raverdir,
et li douz chanz des menus oiseillons
fait as plusours de joie souvenir;
las, chascuns chante et je plour et souspir,
et si n'est pas droiture ne raisons;
ainz est adés toute m'ententïons,
dame, de vous honourer et servir.
II.
Se j'avoie le sens qu'ot Salemons,
si me feroit amours pour fol tenir;
quar tant est fors et crueuz sa prisons
(qu'ele me fait assaier et sentir)!
bien me deüst espasser et garir,
et enseignier quelle est ma guerisons,
car j'ai servi lonc tans et en pardons,
et servirai adés sans repantir.
III.
Mout m'esmerveill quele est li ochoisons,
qu ele me fait si longuement languir:
je sai mout bien qu'ele croit les felons,
les losengiers (que Diex puist maleïr!);
toute lor painne ont mise en moi trahir,
maiz ne lor vaut lor morteuz trahisons,
quant il savront queus iert li guerredons,
dame, de vous, cui ainc ne seu mentir.
IV.
Ainc ne la seu losengier ne flater
(ne ja Diex sens ne m'en doint ne talent!),
maiz ma dame servir et honourer
et faire adés a son conmandement;
et sachiez bien (se biauz servirs ne ment,
ou li miens cuers, qui bien me puet grever)
que touz les biens c'on puet avoir d'amer
avra mes cuers, qui adés s'i atent.
V.
Se vous daigniez ma proiere escouter,
douce dame, je vous proi et demant
que vous pensés de moi guerredoner;
je penserai de bien servir avant.
De tous les maus ke j'ai ne m'est noiant,
douce dame, se me volés amer:
em poi de tans poés guerredoner
les biens d'amors ke j'ai atendus tant.