Lerond

Versione stampabilePDF version

I.
Li nouviauz tanz et mais et violete 
et lousseignolz me semont de chanter, 
et mes fins cuers me fait d'une amourete 
si douz present que ne l'os refuser. 
Or me lait Diex en tele honeur monter 
que cele u j'ai mon cuer et mon penser 
tieigne une foiz entre mes braz nuete 
ançoiz qu'aille outremer!

II.
Au conmencier la trouvai si doucete, 
ja ne quidai pour li mal endurer, 
mes ses douz vis et sa bele bouchete 
et si vair oeill, bel et riant et cler, 
m'orent ainz pris que m'osaisse doner; 
se ne me veut retenir ou cuiter, 
mieuz aim a li faillir, si me pramete, 
qu'a une autre achiever.

III.
Las! pour coi l'ai de mes ieuz reguardee, 
la douce rienz qui fausse amie a non, 
quant de moi rit et je l'ai tant amee? 
Si doucement ne fu trahis nus hom. 
Tant con fui mienz, ne me fist se bien non, 
mes or sui suenz, si m'ocit sanz raison; 
et c'est pour ce que de cuer l'ai amee! 
n'i set autre ochoison.

IV.
De mil souspirs que je li doi par dete, 
ne m'en veut pas un seul cuite clamer; 
ne fausse amours ne lait que s'entremete, 
ne ne me lait dormir ne reposer. 
S'ele m'ocit, mainz avra a guarder; 
je ne m'en sai vengier fors au plourer; 
quar qui amours destruit et desirete, 
ne l'en doit on blasmer.

V.
Sour toute joie est cele courounee 
que j'aim d'amours. Diex, faudrai i je dont? 
nenil, par Dieu: teus est ma destinee, 
et tel destin m'ont doné li felon; 
si sevent bien qu'il font grant mesprison, 
quar qui ce tolt dont ne puet faire don, 
i1 en conquiert anemis et mellee, 
n'i fait se perdre non.

VI.
Si coiement est ma doleurs celee 
qu'a mon samblant ne la recounoist on; 
se ne fussent la gent maleüree, 
n'eüsse pas souspiré en pardon: 
amours m'eüst doné son guerredon. 
Maiz en cel point que dui avoir mon don, 
lor fu l'amour descouverte et moustree; 
ja n'aient il pardon!