I.
Fine amours et bone esperance
me ramainne joie et chanter,
se cele m'oste ire et pesance
qui tant m'avra fait endurer,
c'ainc ne m'i vout guerredonner;
pour ce ai esmai et doutance,
se loiautez de bien amer
u sa granz valours ne m'avance.
II.
Ja ne tenisse a mesestance
qu'a ma dame m'estuet penser,
se par aucune asseürance
i cuidaisse merci trouver;
maiz quant je pluz mi doi fïer,
lors i retruis male vueillance,
si que je n'ose a li parler,
ainz me muir en itel soufrance.
III.
Douce dame en qui j'ai fiance
de ma grant joie recouvrer,
membre vous qu'en longue atendance
me porroit amours trop grever;
je ne m'en puis reconforter,
quar en vous est ma delivrance,
dame, si vous en doit membrer,
selonc vostre douce samblance.
IV.
Toute m'amour ferme et entiere
doins a ma dame ligement;
ja pour ce, s'el n'ot ma proiere,
ne l'amerai mainz loiaument,
quar n'est pas amours autrement:
puiz c'on vait avant et arriere,
sa painne en trait legierement
qui aimme dame nouveliere.
V.
Icele gent fole et ondiere
nous abaissent joie et jouvent,
et fausse drue nouveliere,
qui cestui leisse et autre prent;
si voit l'en avenir souvent
que la pluz fole est la pluz fiere;
pour ce va amours a noient,
que pou trove on maiz qui l'ait chiere.