I.
Quant je voi pluz felons rire
et envoser et chanter,
et voi que chascuns souspire
faussement, por mieuz giller,
lors me fait desconforter
Amors, qui mes maus empire,
et m'a doné tel martire
qui sanz morir mi fait doloir.
Amors font de moi lor voloir,
j'endur les maus por joie avoir.
II.
Mout par est crueus li sire
c'on sert de cuer, sans fausser,
qui se corrouce et aïre
quant il doit guerredoner.
Malz cent tans fait a blasmer
ma dame, ou mes cuers se mire,
la mieudre c'on puist eslire,
la muels vaillanz des meillors.
Se je l'aim ne m'en blasmez mie,
mes fins cuers ne pense aillors.
III.
Tant redout son escondire
et son orgueilloz parler,
quant la voi si n'os rienz dire,
plaindre ne merci crier.
Si me soulaz en penser,
car aillors mes cuers ne tire,
si chant quant pluz la remire,
je m'en lo et si m'en dueil.
Encor soient ci mi oeill,
s'est mes cuers la ou je vueill.
IV.
Mout est Amors fiere et dure
a ceus qui font son talent,
et mains i trueve mesure
cil qui la sert bonement.
Amors, pluz ne vos demant
de toz vos biens, fors droiture
et que ne me puissent nuire
faus et felon qui m'ont mort.
J'ai tot perdu por loiaument amer
n'onques n'o de li confort.
V.
Uns dous espoirs m'asseüre
qui me resjoïst sovent,
c'ainc tant bele creature
n'ama nus en son vivant.
Rienz ne faut en son cors gent
ne en sa simple figure,
fors tant que de moi n'a cure,
dont je morrai d'envie.
Aler m'estuet el douz païs
ou je laissa m'amie.