I.
Fine amours claimme en moi par hiretage
droit: s'est raisons, quar bien et loiaument
l'ont servie de Creon, lor aage,
li bon seigneur, qui tindrent ligement
pris et valour et tout enseignement,
s'en chanterent, et je tout ausiment
vueill que de chant et d'amour lor retraie,
et del seurplus me met en sa manaie,
de cuer, de cors et d'ounour et de vie,
com a ma douce, droite seignourie.
II.
La manaie de mon droit seignourage
aim et pris tant que de li seulement
atent et croi avoec mon fin corage
touz biens par joie, et est droiz, qu'autrement
n'est nus fins biens eüs entierement
sanz grant joie: pour coi tout quitement
me rent a vous, douce dame veraie;
et s'il est nus qui grant bien sanz joie aie,
folz est se il en amour ne se fie,
par coi touz biens et joie mouteplie.
III.
Tel joie avoir ne doit faus cuers volage,
qui par tout proie et par tout fausse et ment:
se tout conquiert par son faussant language,
la mençonge li deffait et desment;
quar teus com est li desirs c'on enprent
convient estre la joie c'on atent,
ne il n'est drois qu'a teus gens estre doie
d'amours eüe issi trés haute joie
qui a touz vaut et a valoir aïe
et seur touz est hounouree et servie.
IV.
Mout connoist bien dame entendanz et sage
s'on la proie de cuer u faintement,
au fait, au dit, au sanblant, au visage,
qu'ausi c'om set le droit sens droitement
tout pour les faus convient il qu'ensement
sache des mauz, si dirai bien comment
pluz sagement eschiver les en doie,
quar sens de ghille a ghiller ghille avoie
pluz qu'autre rienz, et tout par sa maistrie
est trahisons, trahir quidant, trahie.
V.
Et pour teus gens prist ele mon homage
pour soi fïer en moi seürement.
Amours en tient mon fin cuer en hostage;
en sa prison l'a bien et fermement,
guardant la guarde en qui pluz fïement
se fie Amours de guarder ceus que prent:
c'est Loiautez qui guarde et qui maistroie
touz ceuz seur qui fine amours seignouroie,
si n'est raisons c'on li puist blasmer mie
quant teus guarde a tel hoste en sa baillie.