I
Pos de chantar m'es pres talenz,
farai un vers, don sui dolenz:
mais non serai obedienz
en Peitau ni en Lemozi.
II
Qu'era m'en irai en eisil:
en gran paor, en gran peril,
en guerra laissarai mon fil,
e faran li mal siei vezin.
III
Lo departirs m'es aitan grieus
del seignoratge de Peitieus!
En garda lais Folcon d'Angieus
tota la terra e son cozi.
IV
Si Folcos d'Angieus no·l socor,
e·l reis de cui ieu tenc m'onor,
faran li mal tut li plusor,
felon Gascon et angevi.
V
Si ben nos es savis ni pros,
cant ieu serai partiz de vos,
vias l'auran tornat en jos,
car lo veiran jov' e mesqui.
VI
Merce quier a mon compaignon,
s'anc li fi tort qu'il mo perdon;
et ieu prec en Jesu del tron
et en romans et en lati.
VII
De proeza e de joi fui,
mais ara partem ambedui;
et eu irai m'en a scellui
on tut peccador troban fi.
VIII
Mout ai estat cuendes e gais,
mas nostre Seigner no·l vol mais;
ar non puesc plus soffrir lo fais,
tant soi aprochatz de la fi.
IX
Tot ai guerpit cant amar sueill,
cavalaria et orgueill;
e pos Dieu platz, tot o acueill,
e prec li que·m reteng' am si.
X
Toz mos amics prec a la mort
que vengam tut e m'onren fort,
qu'eu ai avut joi e deport
loing e pres et e mon aizi.
XI
Aissi guerpisc joi e deport
e vair e gris e sembeli.