Huet

Versione stampabilePDF version

I.
Tant m'a mené force de seignorage
Et une amor qui au cuer me descent,
Que je ne puis plus celer mon corage;
Si chanterai, s'ire nel me desfent;
Que celle m'a grevé trop longuement
Qui de mon cuer ne prist onques ostage,
Puis qu'ele l'ot a son comandement.
 
II.
Pechié fera s'ele tient a outrage
Ce que je l'aim si amorosement;
Qu'en li amer ne crien mort ne damage.
Tels est l'amor qui m'enflame et esprent.
Morir en puis; mais point ne m'en repent,
Que mon fin cuer li donai d'avantage,
Quant j'esguardai son cors premierement.
 
III.
Une des riens qui plus me tient en ire
Si est de ce qu'ele fait bel semblant
Vers une gent qu'on ne puet trop despire,
Felon, sens foi, cruel et mesdisant;
Et quant jes truis devant li ennuiant
Lors si ne sai que faire ne que dire;
Toz esbahiz m'i oubli en estant.
 
IV.
De ceste amor, dont je trai tel martire
Que devant li me fait dormir veillant,
Ne porroit nus, ce cuit, mon mieus eslire,
Car autresi m'i resveil en dormant.
Lors vient ma joie et vait a son talant;
Si angoissos me truis a l'escondire,
Qu'a pou mes cuers ne part en souspirant.
 
V.
Douce dame, onques ne mi soi faindre
De vos amer, ainsi l'ai comencié;
Ma volentez en est chascun jor graindre,
Ne contre ce n'avez de moi pitié;
Qu'Amors le m'a comandé et priié:
Que fins amis doit morir, ou ataindre
Ce qu'a toz jors pensé et covoitié.
 
VI.
Nus ne se doit de loial amor plaindre
Puis qu'il i a son service emploié;
Ce n'a mestier; tant ne m'i set destraindre
Que ja vers li aie mon cuer irié;
Et se li plest, mout m'a bien essaié;
Onques ne soi decevoir ne ataindre,
Dont meint felon se seront avancié.
 
VII.
Amis Gillès, lons tans m'a travaillié
Ma loiautez qui ne puet pas remaindre;
Si croi qu'Amors vos a mal conseillié.