I.
Por verdure ne pour prée,
Ne por fueille ne pour flor
Nule chançon ne m'agree,
Se ne muet de fine amor,
Mais li faignant proieor,
Dont ja dame n'iert amée,
Ne chantent fors qu'en pascor,
Lors se plaignent sanz dolor.
II.
Dame tieng a esgarée
Qui croit faus dru menteor,
Car honte a longue durée
Qui avient par tel folor;
Et joie a pou de savor
Qui en tel lieu est gastée,
S'en li a tant de vigor
Que hée sa deshonor.
III.
Fause drue abandonnée
Vuet les nos et puis les lor,
Ne ja s'amor n'iert emblée
Que nel sachent li plusor;
Mais a dame de valour,
Bele et bone et acesmée,
Qui ne croit losengeor,
Doit l'en penser nuit et jour.
IV.
Mout m'a Amors atournée
Douce paine et beau labour,
Car ja por rien qui soit née
N'oblierai ceste ceste hounour
D'amer tote la meillour
Qui soit par les bons loée;
Mais de tant sui en error
Qu'onques n'amai sens paor.
V.
Tant s'est Amors afermée
En mon cuer a lonc sejor
Que j'ai plus haute pensée
Que tuit li autre ameor;
Mais li faus enquereor
Font uevre malaürée,
Engin de mainte color,
Por torner joie a tristor.
VI.
Dame, cele part ne tor
Que m'amors ne soit doblée
Et mi desconfort greignor,
Dont je morrai sens retor.