I.
Oëz por quoi plaing et sospir:
Seignor, n'en fes pas a blasmer.
Toz jors m'estuet ma mort servir;
Amors, n'en puis mon cuer oster;
Mes honor ai d'einsi morir;
Si en vueil bien les max sofrir,
Tant que plus en puisse monter.
II.
S'Amors me fait ses maus sentir
Il ne m'en doit mie peser,
Qu'autres nes puet mais sostenir
Une hore, sens soi reposer;
Mes je sui amis sens mentir,
Ja Deus ne m'en lest repentir!
Car en amant vueil bien finer.
III.
Amor, tel hore fu jadis
Qu'estre me laissïez en pes;
Mais or sui je verais amis,
N'autre riens ne me grieve mes.
Serai je donc de vos ocis?
Nenil; trop avrïez mespris
Quant je tot por vos servir les.
IV.
Cuers, qu'en puis mes se sui pensis,
Quant tu m'as chargié si grief fes?
– Ha! cors, de neant t'esbahis,
Ja n'ama onques hom mauvès.
Serf tant que tu aies conquis
Ce que plus desires toz dis.
– Voire, cuers, més la morz m'est pres.
V.
Gui de Pontiaus, en fort prison
Nos a mis Amors sens confort,
Vers celes qui sanz ochoison
Nos ociront; dont ele a tort.
Oïl, car leaument amon;
Ja ne nos en repentiron.
Bon amer fait jusqu'a la mort.
VI.
Gasçoz define sa chançon.
Ha! fins Pyramus que feron?
Vers Amors ne somes jor fort.