I.
Li plusour ont d'amours chanté
Par esfort et desloiaument;
Mes de tant me doit savoir gré,
Qu'onques ne chantai faintement.
Ma bone foi m'en a gardé,
Et l'amours, dont j'ai tel plenté
Que merveille est se je rienz hé,
Neïs cele enviouse gent.
II.
Certes j'ai de fin cuer amé,
Ne ja n'amerai autrement;
Bien le puet avoir esprouvé
Ma dame, se garde s'en prent.
Je ne di pas que m'ait grevé
Qu'el ne soit a ma volenté,
Car de li sont tuit mi pensé,
Mout me plet ce que me consent.
III.
Se j'ai hors du païs esté,
Ou mes biens et ma joie atent,
Pour ce n'ai je mie oublié
Conment on aime loiaument;
Se li merirs m'a demoré
Ce m'en a mout reconforté,
Qu'en pou d'ore a on recovré
Ce qu'on desirre longuement.
IV.
Amours m'a par reson moustré
Que fins amis sueffre et atent;
Car qui est en sa poësté
Merci doit proier franchement,
Ou c'est orgueus; - si l'ai prouvé;
Mais cil faus amorous d'esté,
Qui m'ont d'amors ochoisoné,
N'aiment fors quant talens lor prent.
V.
S'envïous l'avoient juré,
Ne me vaudroient il nïent,
La dont il se sunt tant pené,
De moi nuire a lor essïent.
Por ce aient il renoié Dé,
Tant ont mon enui pourparlé
Qu'a paine verrai achevé
Le penser qui d'amours m'esprent.
VI.
Mes en Bretaigne m'a loé
Li cuens, cui j'aim tot jors aé,
Et s'il m'a bon conseil doné,
Ce verrai je procheinement.