I.
Les oisillons de mon païs
Ai oïz en Bretaigne;
A lor chant m'est il bien a vis
Qu'en la douce Champaigne
Les oï jadis,
Se n'i ai mespris.
Il m'ont en si dous penser mis
Qu'a chançon faire me sui pris
Tant que je parataigne
Ce qu'Amours m'a lonc tens promis.
II.
De longue atente m'esbahis
Sanz ce que je m'en plaigne;
Ce me tout le gieu et le ris;
Nus cui amours destraigne
N'est d'el ententis.
Mon cors et mon vis
Truis si mainte foiz entrepris
Qu'un fol semblant i ai apris.
Ki qu'en amor mespraigne,
Ainc, certes, plus ne li mesfis.
III.
En besant mon cuer me ravi
Ma douce dame gente;
Trop fu fous quant il me guerpi
Pour li qui me tormente!
Las! ains nel senti,
Quant de moi parti;
Tant doucement le me toli
Qu'en sospirant le trest a li;
Mon fol cuer atalente,
Mais ja n'avra de moi merci.
IV.
D'un beser dont me menbre si,
M'est avis, en m'entente,
Qu'il n'est hore, ce m'a traï,
Qu'a mes levres nel sente.
Quant elle souffri
Ce que je la vi,
De ma mort que ne me gari!
Elle set bien que je m'oci
En ceste longe atente,
Dont j'ai le vis taint et pali.
V.
Puis que me tout rire et juer
Et fet morir d'envie,
Trop souvent me fet comparer
Amours sa compeignie.
Las! n'i os aler,
Car pour fol sembler
Me font cil faus proiant d'amer.
Morz sui quant jes i voi parler;
Que point de trecherie
Ne puet nus d'eus en li trouver.
(Autre rédaction)
III.
Ainc vers Amour rien ne forfis;
Ja de moi ne se plaigne;
Einçois por li servir nasqui,
Coment ke me destraigne.
Par un tres dous ris
Sui de joie espris,
Que, se j'ere rois de Paris
Ou sire d'Alemaigne,
N'avroie tant de mes delis,
Qu'Amours me fet cuider touz dis.
IV
Bien doit estre liés et jolis
Cui Amours tant adaigne
Que il se truist loials amis,
Et qu'a amer l'apraigne.
Ne doit estre eschis,
Mais adès sougis,
A celi cui proie mercis;
Puis que son cuer a en li mis,
Sanz partir s'i ataigne
Pour estre de joie plus fis.