I.
Iriez et destroiz et pensis
Chanterai amorosement,
Que contre mon cuer l'ai empris;
A pou que je ne m'en repent!
Car qui savroit le grief torment
Dont la nuit et le jor me sent,
Por fine amour veraie,
De voir savroit qu'a son grant tort m'essaie.
II.
Deus! tant m'avra cist maus sopris,
S'en garrai, si ne sai coment;
Et se je muir leaus amis
Gariz sui honoréement;
Et s'en morant ma joie atent,
Je l'atendrai mout bonement,
Quel que mal que j'en traie.
Bien ait dolor qui si grant joie apaie!
III.
En maintes menieres devis
Ma joie, mes trop me vient lent;
Se j'en fusse poesteïs
Sachez qu'il alast autrement;
Car quant plus a amer entent
Amor me grieve plus forment;
Sens nul bien que j'en aie;
Fors seulement esperance m'espaie.
IV.
Onques ma dame ne requis
Riens outre son comandement;
Mes ses gens cors et ses clers vis
Et sa grans valors me defent
Que je n'aie fol hardement
De prier ainsi hautement;
Ainz atendrai manaie.
Deus, que ferai, se s'amor me delaie!
V.
Mout i ai eüz enemis
Faus et crueus vilainement;
Car plus dout et ferai toz dis
Lor ennui qu'autrui hardement,
Car plus aiment decevenment.
Li traïtres qui jure et ment
Ocit plus tost sens plaie
Que li hardiz qui en valor s'essaie.
VI.
Sire, se ma vie me rent
Cele qui m'a mort longuement,
A son oés revivroie;
Cil ne vit pas, cui granz ire maistroie.
Sire, por Deu, priez li que m'en croie.