Huet

Versione stampabilePDF version

I.
Des or me vueill esjoïr
En chantant, en tel maniere
Que jamès ne quier issir
De riens qu'Amours me requiere,
Que si bel m'a fait choisir
Qu'a l'un ne puis mes faillir:
Ou beau vivre, ou beau morir,
En merci et en priiere.
 
II.
Et puis qu'il vient a plesir
A la debonaire fiere,
Qu'ele mon chant daingne oïr,
Toute autre rien met ariere;
Qu'ainsi me puist bien venir,
Com je plus l'aim et desir
Que ne savroie jehir:
Com plus i pens, plus l'ai chiere.
 
III.
Et s'aucune fois m'aïr
Pour fole gent nouveliere,
Tost me covient revenir
A ma matiere premiere,
Dont ne querroie partir;
Mes tant redout lor mentir,
Que sovent me font fremir
De lor maudire en derriere.
 
IV.
Quant sa grant beauté remir,
Qui est tant fiere et entiere,
Le beau cors, qu'a grant loisir
Fist Deus en joie pleniere,
Les biaus ieus qui pour traïr
Ne sevent clore n'ovrir,
Sachez que d'a li venir
Est ma volentez maniere.
 
V.
S'el me doigne retenir,
Dies, si tres joianz en iere!
Maiz ce m'a fet esbahir
Qu'ele n'est pas costumiere
De tel guerredon merir,
N'autres ne m'en puet guerir.
Por ce ne doi acueillir
Volenté fause et legiere.
 
VI.
Hon ne se puet mieus honir
Que de son bon repentir.
Si vueill mieus en ce fenir
Ne jamais partis n'en iere.

VII.
Chançons, di mon Bel Desir
Qu'a li, s'el me daigne oïr,
N'en doit on nule aatir
D'Espaigne trusqu'en Baviere.
 
VIII.
Beaulandois, li grief sospir,
Qu'a laron fais sens dormir,
Me font volentiers guenchir
Vilainne gent, mal parliere.