Fratta

Versione stampabilePDF version

I.
Gent es, mentr’om n’a lezer,      
s’enans de son mielhs a faire,    
que, quan s’aizina·l cuidaire,    
tal hor’ es larcs de voler,       
e qui enans es avertitz           
que l’aguaitz li sia yssitz,      
non es ges del tot muzaire.       

II.
Contr’aso deu aparer              
en cuy sens es alberguaire,       
que sciensa no pretz guaire       
s’als ops non la vey valer;       
doncs ar er de mi sentitz         
lo sabers don suy tequitz,        
s’er fis o mesclatz de vaire.     

III.
Qu’el segl’ ai fag mon plazer     
tan qu’en suy de trop peccaire,   
et ar agrada·m n’estraire,        
pus Dieus pro·m n’a dat lezer;    
qu’esser pot hom descauzitz       
e non es ops n’an delitz          
per oltracujat vejaire.           

IV.
Pueys Dieus so·m laissa vezer     
en que puesc esser miraire        
de mo mielhs e·l sordeis raire.   
Hon om plus a de saber,           
hon maier sens l’es quesitz,      
et aquelh par plus falhitz        
qu’a sos ops n’es enguanaire.     

V.
Mas s’ieu en saubes lo ver        
be sai, for’ ancar compaire       
de ioven et enquistaire.          
Sil ric, cuy degra chazer         
en grat, fan vis esbauditz,       
mas si·l fals segl’ es mestitz    
que·il fait son pauc contra·l braire. 

VI.
E mentr’usquecs pot querer            
luy qu’es vers Dieus e salvaire       
mout es endreg si bauzaire,           
pus o met en nonchaler;               
que mager gratz n’es cobitz           
qui fer s’escolp que feritz,          
d’aitan suy ben esperaire.            

VII.
So fera plus a temer,                 
per que suy meravilhaire              
qu’hom non es Dieu reguardaire,       
tro qu’es tan prosmatz al ser         
que·l iornals l’es escurzitz;         
e s’adoncx no·l ven complitz          
non cug que pueys se n’esclaire.      

VIII.
Amors, be·m degra doler,              
si negus autr’enginhaire              
mas lo dreituriers iutiaire           
de vos me pogues mover;               
que per vos er’ enriquitz,            
essaussatz et enantitz                
e pel senhor de Belcaire.             

IX.
Mas so non pot remaner,               
cortez’amors de bon aire,             
don mi lais esser amaire,             
tan m’agrada a tener                  
lai on vol sanhs esperitz;            
e pueys el mezeys m’es guitz,         
no·us pes s’ab vos non repaire.       

X.
Qu’ ieu sai, tan rics governaire      
no·m denhes en guit aver              
— Peire d’Alvernhe so ditz —          
no de·us for’ enquer partitz          
ni per autr’amor camiaire.