Eusebi

Versione stampabilePDF version

I
Pos de chantar m'es pres talenz,
farai un vers don sui dolenz:
mais non serai obedienz
en Peitau ni en Lemozi.
 
II
Qu'era m'en irai en eisil 
en gran paor et en peril,
en guerra, laissarai mon fil,
e volran li mal siei vezi.
 
III
Lo departirs m'es aitan grieus
del seignorage de Peitieus:
en garda lais Folcon d'Angieus
tota la terra e son cozi.
 
IV
Si Folcos d'Angieus no·l socor,
e·l reis de cui ieu tenc m'onor,
guerrejar l'an tut li plusor,
felon Gascon et Angevi. 
 
V
Si ben non es savis e prso,
cant ieu serai partitz de vos,
vias l'auran tornat en jos
car lo veiran jov'e mesqui.
 
VI
Merce clam a mon compaignon,
s'anc li fi tort, q'il m'o perdon,
et el prec en Jezu del tron
en romans et en son lati.
 
VII
De proez'e de jovan fui,
mais ara partem ambedui,
et eu irai m'en a cellui
on tuit peccador troban fi.
 
VIII
Mout ai estat cuendes e gais
mas Nostre Seigner no·l vol mais;
ar non puesc plus soffrir lo fais
tant soi aprochatz de la fi.
 
IX
Tot ai guerpit cant amar sueill,
cavalaria et orgueill;
e pos Dieu platz tot o acueill,
e el que·m reteigna ab si.
 
X
Totz mos amics prec a la mort
qu'il vengan tuit e m'onren fort,
qu'eu ai avut joi e deport
loing e pres en mon aizi.
 
XI
Aissi guerpisc joi e deport
e vair e gris e sembeli.